Olmaliq-Navbahor. Preview
14-iyun kuni Navbahor I-davradagi so'nggi o'yinini Toshkent viloyatida Olmaliq jamoasiga qarshi o'tkazadi. Olmaliq ham, Navbahor ham dastlabki davraning so'nggi o'yinida g'alaba qozonishni maqsad qilganligi kundek ravshan. Joriy yilgi mavsumni Olmaliq juda muvaffaqiyatsiz o'tkazmoqda. Esingizda bo'lsa, o'tgan mavsumni Shkvirin shogirdlari ajoyib tarzda o'tkazib yakunda 4-o'rinni egallagandi. Ayni paytda esa Olmaliq 13-pog'onaga mustahkam o'rnashib olgan. Ushbu mavsumda olmaliqlar o'z uylarida faqat Paxtakor va Bunyodkorga (xuddi Navbahor singari) imkoniyatni boy berishgan. Olmaliqning o'z uyida qayd etgan natijalari Navbahorniki bilan deyarli bir xil. Navbahor ham, Olmaliq ham Mash'al va Nasaf bilan o'z maydonida durang qayd etgan bo'lsa, Sho'rtan ikkala jamoaga ham safarda mag'lub bo'lgan. Faqat to'plar nisbati boshqacharoq, xolos.
Navbahor esa, so'nggi ikki mavsumdagi natijasiga solishtirib fikr bildiradigan bo'lsak, joriy yilgi chempionatni yaxshi o'tkazmoqda. Namanganliklarda davralar oralig'iga 4-o'rinda chiqib ketish imkoniyati bor. Buning uchun Olmaliq mag'lub etilishi kerak hamda Paxtakor ushbu o'yindan bir kun avval Qizilqumni Toshkentda yengishi lozim bo'ladi.
Ushbu uchrashuv oldidan har ikki jamoa ham O'zbekiston Kubogining 1/8 final uchrashuvlarida dastlabki o'yinlarni o'tkazishdi. Navbahor Dinamoga mehmonda (1:2) mag'lub bo'ldi. Olmaliq esa Farg'onada Neftchi bilan bo'lgan bahsda o'zi uchun kerakli natijani ushlab qola bilmadi. So'nggi ikki daqiqa ichida mezbonlar 2 marta Olmaliq darvozasini ishg'ol qilishib, yakunda 4:2 hisobida Neftchi zafar quchdi.
Navbahorning ukrainalik goleadori - Yuriy Tselix o'z hisobidagi sariq kartochkalarni soni to'rttaga yetganligi uchun ushbu o'yinda jamoasiga yordam bera olmaydi. Akmal Xolmurodov va Mikola Pavlenkolarda kichik jarohatlar bor. Balki ushbu futbolchilar ham maydonga tushmasliklari mumkin.
Olmaliq-Navbahor uchrashuvini Nasafning sobiq futbolchisi Baxtiyor Namozov boshqaradi. Bu uning oliy ligadagi ikkinchi bosh hakamligi hisoblanadi. Namozov shuningdek, kubok bahsida Kosonsoy-Andijon (1:5) bahsini ham boshqargandi. Oleg Dachev hamda Radik Serazitdinovlar unga qanotlarda ko'maklashadi. Zahira hakami sifatida A.Rubakov va nazoratchi etib esa B.Galeyev qayd etilgan.
Mazkur jamoalar chempionatlarimiz tarixida atigi 4 marta uchrashgan, xolos. Olmaliq jamoasi 2008-yilgi mavsumdan boshlab oliy ligada ishtirok etib kelyapti. O'shanda Traktor va To'palang jamoalarini elitadan chetlatilishi Metallurg va OTMK (dastlab shu nomda to'p surilgan) ga qo'l kelgandi. O'tkazilgan 4 ta o'yinning bittasida Olmaliq zafar quchgan. Navbahor ham bir marta Olmaliqdan ustun kelgan. Qolgan 2 ta o'yinda durang qayd etilgan. To'plar nisbati 3:3, bu borada ham tenglik! Bu galgi to'qnashuvda jamoalarni imkoniyatini teng baholagan bo'lardik.
O'ZARO O'YINLAR NATIJALARI
2008-yil
4-tur. Navbahor-OTMK 2:0 (Shuhrat Mirxoldirshoyev 25, Diydor Xojiyev 85)
27-tur. OTMK-Navbahor 1:1 (Shavkat Mullajonov 66 - Sherzod Sharipov 10)
2009-yil
1-tur. Navbahor-Olmaliq 0:0
30-tur. Olmaliq-Navbahor 2:0 (Sobir Usmonxo'jayev 27, Bahrom Haydarov 75-pen)
Ulug'bek Abdullayev
Манба http://fcnavbahor.wap.sh