Олий лига клублари ўртасидаги янги XIX-чемпионатда 14 та жамоа қатнашади. Бу ҳақда бугун Ўзбекистон футбол Федерацияси Президенти Мираброр Усмонов қабулида ўтказилган янги мавсумга бағишланган йиғилишда маълум қилинди.
Ҳозирча янги чемпионат қачон старт олиши ва қайси формат асосида ўтказилиши аниқ эмас. Айни пайтда ушбу масала устида иш олиб борилмоқда. Фақатгина бу йилги мавсумда 14 та жамоа иштирок этиши хал этилди. Шу тариқа, ўтган мавсумда Биринчи лигага тушиб кетган Жиззахнинг "Сўғдиёна” ва Бухоронинг "Бухоро” клублари ўрнини Олий лигада ҳеч ким эгалламайдиган бўлди.
Таъкидлаш лозимки, Олий лигада 14 та клубнинг иштирок этиши Ўзбекистон чемпионати учун янгилик эмас. Яъни, 1992 йилдан буён ўтказиб келинаётган Ўзбекистон чемпионатида икки бора 14 тадан жамоа қатнашган. Бу ҳолат 2004 ва 2005 йилги мавсумларга тўғри келади. Шунингдек, бир марта – 2000 йили Олий лигада 20 та (!) клуб рўйхатдан ўтган.
Манба: ПФЛ расмий сайти.