Ushbu uchrashuvdan avval har ikki jamoaning murabbiylar shtabida o`zgarishlar yuzaga keldi. Mavsum boshida 4-bor ``Navbahor``ni qabul qilib olgan Viktor Jalilov rasman 21-sentyabr kuni jamoani tark etib, ``Dinamo``ga yo`l oldi. ``Lokomotiv`` murabbiylar shtabiga esa Davron Fayziyev kelib qo`shildi. Uchrashuv mehmonlarning ustunligi ostida boshlandi. 3-daqiqada Farhod Usmonov qanotdan oshirilgan to`pni qabul qilib 10 m lardan darvoza tomon zarba beradi. Uning zarbasi darvoza ustunini larzaga keltiradi. Har ikki jamoaning hujumdagi asosiy o`yinchilarining yo`qligi baribir bilinib turdi. Bo`lim o`rtalariga kelib jamoalar hujumkor o`yin namoyish qilishdi. 22-daqiqada Vladislav Kiryanning 22 m lardan bergan zarbasini, oradan ko`p o`tmay Dilshod Jabborovning jarimadan yo`llagan zarbasini sobiq ``temiryo`lchi`` Aziz Ashurov bartaraf etdi. 25-daqiqaga kelibgina ``Navbahor`` ilk xavfli hujumni sodir etdi. Bu holatda G`ayrat Jo`rayev Filimonov bilan yakkama-yakka chiqib, vaziyatni yo`qqa chiqardi. Keyinchalik Otabek Valijonovning 8-9 m lardan bergan kuchli zarbasi darvoza to`sini yuqorisidan o`tib ketdi. Bo`lim oxiriga kelib esa endi Ilhom Boydedayev birga-bir holatni ko`kka sovurdi. 
Ikkinchi bo`lim teng kurashlar ostida boshlandi. Bo`lim avvalida yana Farhod Usmonovda qulay imkoniyat bo`ldi. Uning yaqin masofalardan bergan kuchli zarbasi to`sindan o`tib ketdi. Biroz o`tib esa ikkinchi bo`limda safga qo`shilgan o`rinbosarlar to`purari Abdumalik Abdullayevda ham xuddi shunday imkoniyat bo`ladi. Ammo uning zarbasi ham darvoza to`sini yuqorisidan o`tib ketdi. Bo`lim o`rtalarida mehmonlar hujumchisi Nikolay Guryanov va Dilshod Rahmatullayevlarda juda qulay imkoniyatlar bo`ldi. Hal qiluvchi zarbalarni esa ``Navbahor`` posboni mahorat bilan qaytardi. Sergey Kovshovning ham, Tachmurod Agamurodovning ham tarkibda o`zgarishlar qilishi o`yin sur`atini o`zgartirib yubordi, ayniqsa Kovshovning o`yinchi almashtirishi o`z samarasini berdi. 80-daqiqaga kelib hisob ochildi. Filimonov o`z postini tark etib to`pni jamoadoshiga yetkazib beradi. Ammo mehmonlar himoyachisi kutilmaganda ortida turgan Alisher Mahmudovga to`pni oldirib qo`yadi. Alisher esa 25 m lardan bo`sh darvozani aniq nishonga oladi - 1:0. Hali o`ziga kelib ulgurmagan ``Loko`` o`yinchilari oradan 4 daqiqa o`tib yana o`z darvozalaridan to`p olib chiqishadi. Bu vaziyatda tinib-tinchimas Abdumalik Abdullayev darvozabon bilan yakkama-yakka chiqib, yakuniy hisobni o`rnatdi - 2:0. Bu Abdumalikning ``Navbahor``dagi debyut golidir. Shunday qilib, 2500 (!!!) muxlis qarshisida ``Navbahor`` nihoyat g`alaba nashidasini surdi. 
NAVBAHOR-LOKOMOTIV 2:0 
Gollar: Alisher Mahmudov 80, Abdumalik Abdullayev 84 
``NAVBAHOR``: Aziz Ashurov, Mixail Denisov, Timur Ayzatulov, Rahmatullo Berdimurodov, Sunnatulla Mamadaliyev, Otabek Valijonov (Alisher Mahmudov 56), Timur Sultonov, Ilhom Boydedayev (Muxtor Fozilov 70) , Doniyor Usmonov, G`ayrat Jo`rayev, Elyor Jahonov (Abdumalik Abdullayev 46) 
``LOKOMOTIV``: Aleksandr Filimonov, Yevgeniy Gogol, Kaxi Maxaradze, Javlon Ibragimov, Dilshod Rahmatullayev (Bahrom Yuldashev 85), Dilshod Jabborov, Alisher Yusupov, Nodir Quziboyev (Nikolay Guryanov 59), Obid Jo`raboyev, Farhod Usmonov (Sergey Litovchenko 61), Vladislav Kiryan. 
Ogohlantirishlar: Rahmatullo Berdimurodov 53, Sunnatulla Mamadaliyev 68, Timur Sultonov 83 - Nodir Quziboyev 27, Obid Juraboyev 73. 
Chetlatish: Sunnatulla Mamadaliyev 90+2