Ўзбекистон футбол федерациясининг тажрибали мутахассиси Алишер Никимбаев энди ўз фаолиятини Осиё футбол конфедерациясининг Профессионал футбол бўлимида давом эттиради. Бу ҳақда ЎФФ матбуот хизмати хабар тарқатмоқда.
ЎФФ расмий сайти Никимбаевнинг янги лавозимга тайинланиши билан уни суҳбатга тортди. Никимбаев янги иши борасида гапирар экан, бу ОФКдаги янги таъсис этилган лавозим эканлигини таъкидлаб ўтди.
«Келаётган шанба куни Малайзияга учиб кетаман ва ОФК қароргоҳида янги иш фаолиятимни бошлайман. У ерда мен ОФК Чемпионлар лигасида иштирок этадиган клубларни ўрганиш ва баҳолаш бўйича менежер сифатида ишлайман».
«Бу янги лавозим ва у фақатгина ўтган йили киритилган. Профессионал футбол бўлими ОФК Чемпионлар лигасида қатнашадиган мамлакатларнинг футбол инфратузилмасини ўрганиш ва баҳолаш билан шуғулланади. Агар ёдингизда бўлса, ушбу бўлимнинг текширув комиссияси ўтган йили Ўзбекистонда ҳам бўлиб қайтганди, - деди Никимбаев www.the-uff.com мухбирлари билан бўлган суҳбатда.
Таъкидлаш лозимки, Алишер Никимбаев Ўзбекистон футбол федерациясида 14 йил турли лавозимларда ишлаб келганди.
Манба: www.the-uff.com