Ниҳоят, Россия терма жамоаси ва ЦСКА ярим ҳимоячиси, Россиянинг ўтган мавсумдаги энг яхши ўйинчиси, Евро-2008 қаҳрамонларидан бири Юрий Жирков “Челси” аъзосига айланди.
Бу ҳақида “Челси”нинг бош мурабиийи Карло Анчелотти матбуот анжуманида хабар берди ва бироз ўтиб клубнинг расмий сайти ҳам тасдиқлади. Айтилишича, Жирков кеча Лондонга келган ва тиббий кўрикдан муваффақиятли ўтган.
Британия матбуотининг хабар қилишича, “Челси” футболчи учун Россия клубига 18 миллион фунт тўлайди. Жирков эса лондонликлар билан 4 йиллик шартнома имзолаш арафасида, унга кўра ярим ҳимоячи хафтасига 80 минг фунт маош олади.
Эслатиб ўтамиз, Юрий Жирков “Челси”нинг ушбу трансфер мавсумидаги учинчи хариди саналади. Клуб бунгача “Манчестер Сити” ҳужумчиси Даниэл Старриж ва “Мидлсбро” дарвозабони Росс Тернбеллбилан шартнома имзолаб улгурганди.
- Жамоага қўшилган икки футболчини яхши билмайман, аммо Жирков ҳақида кўп нарсадан хабардорман, - деди Карло Анчелотти, - у жамоамизни кучайтира олади ва катта эҳтимол билан чап қанот ярим ҳимоясида ёки ҳимоясида ўйнайди.
Англияда бир йилдан бери фаолият кўрсатаётган Роман Павлюченко ҳам ушбу трансфер борасида ўз фикрини билдириб ўтди:
- Юранинг “Челси” аъзосига айланганлигидан хурсандман. Бундай имконият хаётда бир марта берилади ва у бундай оқилона фойдаланди. Жирков – ҳақиқий профессионал, ажойиб футболчи. Менимча, у бемалол “Челси”нинг етакчиси бўла олади. Тил муаммосини ҳам Юрий тез фурсатда хал қила олишига ишонаман.