"Насаф" ва "Навбаҳор" клублари ўртасидаги учрашувлар доимо шиддатли кечган. Навбатдагиси ҳам бундан мустасно бўлмади. Таъкидлаш лозимки, орадаги масофа анча узоқлигига қарамай, «Навбаҳор» фан-клубининг 100 нафарга яқин аъзолари ўз суюклиларини қўллаб-қувватлаш учун Қаршидаги стадионда ҳозир бўлишди. Фурсати келганда шуни ҳам таъкидлаб ўтиш жоизки, икки жамоанинг фан-клуби аъзолари ўйин якунланганидан сўнг бир-бирлари билан танишиб, дўстлик муносабатларини ўрнатдилар.
Учрашувда илк дақиқаларданоқ ташаббусни ўз қўлларига олишга ҳаракат қилишган воҳаликлар 5-дақиқада ҳисобни очишлари мумкин эди. Аммо жарима майдончасига ёриб кираётган Камолиддин Мурзоевни меҳмонларнинг туркманистонлик ҳимоячиси Максим Белих қоидага зид ҳолда тўхтатди. Жамоа сардори Ботир Қораев томонидан амалга оширилган жарима зарбасидан сўнг тўп «жонли девор»га тегиб қайтди. Орадан уч дақиқа ўтгач, Белих энди жарима майдончаси ичида Кенжа Тўраевга нисбатан қўполлик ишлатди. Учрашув бош ҳаками Равшан Эрматов иккиланмасдан наманганликлар дарвозаси томон ўн бир метрли жарима зарбаси белгилади. Пенальтини жабрланувчининг ўзи бажарди. Бироқ Кенжанинг зарбасидан сўнг тўп дарвоза устунига тегиб қайтди. Шундан кейин ўйин суръати тенглашди. 20-дақиқада водийликлар жарима зарбаси тепиш ҳуқуқини қўлга киритишди. Дилшод Жабборовнинг кучли зарбасидан сўнг мезбонларнинг украиналик посбони Микола Павленко тўпни қийинчилик билан қайтарди. Орадан икки дақиқа ўтар-ўтмас қаршиликлар ҳисобни очишга муваффақ бўлишди. Кенжа Тўраев майдон марказида тўпни эгаллаб, уни Ботир Қораевга узатди. Чап қанотдан жарима майдончасига ёриб кирган Ботир ўз навбатида Мурзоевни зарба беришга чорлади. Камолиддин уч метрлар чамаси узоқликдан дарвозани аниқ нишонга ола билди.
Иккинчи 45 дақиқаликда ҳисобни тенглаштиришга ҳаракат қилган наманганликлар фаол тўп суришди. Айниқса, ҳужум чизиғидаги Овеков - Караданов жуфтлиги қаршилик ҳимоячиларга етарлича муаммолар туғдирди. Бироқ меҳмонлар тўп киритишнинг уддасидан чиқа олишмади. Натижада «Насаф» навбатдаги ғалабасини нишонлаб, ўз мавқеини мустаҳкамлаб олган бўлса, наманганликлар қаторасига иккинчи мағлубиятларини тан олишди.
Кейинги учрашув 25 апрел куни бўлиб ўтади. Унда жамоамиз Тошкентнинг "Локомотив" жамоасини қабул қилади. Балки ўзимиздаги биринчи ғалабни нишонлармиз, "лочинлар".
18 апрель
«НАСАФ»-«НАВБАҲОР»-1:0 (1:0)
Қарши. 15875 томошабин.
Ҳакамлар: Р.Эрматов-9,8; А.Расулов-9,6; Р.Серазетдинов-9,4; Н.Мешков-9,0.
Гол: К.Мурзоев (22).
Амалга оширилмаган пенальти: К.Тўраев (9, «Насаф»).
«Насаф»: М.Павленко, Б.Қораев, А.Маткевич, Ж.Жиямуродов, К.Тўраев (И.Шомуродов, 39), Л.Тўраев, Ҳ.Каримов, А.Филипосян, К.Мурзоев, С.Шодмонов (О.Мельник, 71), В.Старецкий (Ж.Бобоев, 61).
«Навбаҳор»: Б.Бердиев, Ю.Шеленков, Р.Бердимуродов, В.Кирьян, О.Пирматов, Д.Жабборов (Э.Низомбоев, 53), Н.Отақўзиев, Г.Овеков, М.Караданов, А.Маҳмудов (М.Фозилов, 75), М.Белих (Б.Йўлдошев, 46).
Огоҳлантиришлар: Л.Тўраев (65), Ж.Бобоев (71), А.Маткевич (85) - М.Белих (6), В.Кирьян (26), Н.Отақўзиев (52), Г.Овеков (69).
Назоратчи: К.Мирзабоев.
|