Бугун Мальдив оролларининг Мале шаҳрида ОФК чақирув кубоги мусобақасининг саралаш босқичи ўйинлари бошланади. Унда қўшнимиз - Туркманистон терма жамоаси ҳам иштирок этади. Саралашнинг "В" гуруҳидаги уларнинг рақиблари - Бутан, Филиппин ва майдон эгалари Мальдив терма жамоаларидир.

Туркманистон терма жамоаси бош мураббийи вазифасини бажарувчи Борис Григорянцнинг айтишича, қўшниларимиз саралаш турнирида кучсизланган таркиб билан иштирок этишади. Ушбу мусобақа ФИФА кунларига тўғри келмаганлиги учун бир нечта клублар Туркманистон терма жамоасига аъзо бўлган футболчиларни қўйиб юборишмаган, жумладан, ўзбекистонлик клублар ҳам. "Навбаҳор"дан 5 нафар футболчи - Байрамниёз Бердиев, Максим Белых, Дидар Ҳожиев, Мамедали Караданов, Гувончмуҳаммад Овеков, "Бунёдкор"дан – Гочкули Гочкулиев, “Шуртан”дан - Артур Геворкянларга ўз клубларидан ижозат тегмаган. Шунингдек, Вячеслав Кренделев (“Металлург”, Россия), Владимир Байрамов (“Тобол”, Қозоғистон) ва Эрон клубларидан бирида тўп сураётган Ягмур Аннамурадовлар ҳам саралашда ўз жамоасига ёрдам бера олмайдилар.  

Туркманистон терма жамоаси 14 апрель куни майдон эгалари, 16 апрелда Бутан ва 18 апрель куни Филиппин билан куч синашади. Гуруҳ ғолиби тўғридан-тўғри финал босқичида тўп суриш ҳуқуқини қўлга киритади.