Бу йилги мавсумда Наманганнинг “Навбаҳор” жамоаси ўз олдига юқори ўринларга даъвогарлик қилиш вазифасини қўйганди.

Чемпионатнинг шу кунга қадар ўтказилган учрашувларида Мустафо Байрамов ва Раҳим Қурбонмамедов бошлчилигидаги жамоа аъзолари 15 очко жамғарган ҳолда мусобақа жадвалидаги олтинчи ўринда боришмоқда. Ўтган йилги кўрсаткич билан таққослаганда, бу натижани яхши, деб айтиш мумкин.

Лекин жамоани бунданда юқори ўринлардан бирини банд этишининг эҳтимоли юқори эди. Кутилмаганда бой берилган очколар “Навбаҳор”нинг юқорилишига имкон бермади. Агарда ўйинларга назар ташлайдиган бўлсак, наманганликлар ўз майдонларида нақд етти очкони (!) йўқотишди.
Жамоанинг сафардаги кутилмаган омадсизликлари мухлисларни ранжитгани бор гап. Бунинг замирида нималар ётибди экан қабилида савол туғилиши мумкин. Биринчи навбатда жамоада юзага келган иқтисодий тангликни айтиш мумкин. Тўғри, клуб раҳбарияти мавсум аввалида бошланган ишларни муносиб якунига етказиш мақсадида ҳаракат қилишмоқда. Бурчага маълумки, футболчиларни вақтида моддий томондан қўллаб турилмаса, ижобий натижага эришиш қийин кечади. Айни шу ҳолатнинг юзага келиши оқибатида жамоадаги тартиб-интизом бироз бўшашиб кетгандек туюлмоқда. Негаки бундан бироз олдинроқ, аниқроғи жамоанинг сафардаги ўйинлари чоғида жамоа аъзоларининг бир-бирлари билан уришиб ёки тортишиб қолганликлари ҳақидаги хабарни эшитгандик. Бу каби маълумотларга ойдинлик киритиш мақсадида клуб рамийларига мурожаат қилишимиз мумкин эди. Бироқ, улардан жўяли жавоб олишимизга кўзимиз етмади. Негаки ҳар қандай жамоанинг ички сирлари бўлади. Шундай экан, юқоридаги сингари воқеалар оммага ошкор қилинмайди. Аммо ойни этак билан ёпиб бўлмайди деганларидек, жамоага оид хабарлар қалқиб чиқаверди. Айнан шу ибораларни ўқиган жамоа раҳбарлари ва мураббийлари тортишувларни инкор этган ҳолда ўз эътирозларини билдришлари мумкин. Лекин халқимизда “шамол бўлмаса дарахтнинг учи қимирламайди” деган нақл бор. Демакки, тортишувларнинг юзага келганлиги билан боғлиқ бўлган хабарлар ўз-ўзидан юзага келмаган. 

Ўтган хафтада тарқатилган хабар эса ушбу мақолани ёзишимизга сабаб бўлди. Чемпионатда юзага келган қисқа танаффусдан кейин жамоа аъзоларига қисқа муддатлик таътил эълон қилинганди. Вазиятдан фойдаланиш мақсадида “Навбаҳор”нинг туркман футболчилари ҳам яқинлари билан кўришиш мақсадида ватанларига йўл олишганди. Белгиланган муддатларда футболчилар машғулотларни бошлаб юборишганига гувоҳ бўлдик. Лекин, йиғин бошлангач, бир неча кун ўтдики, ҳужумчи Мамедали Карадановдан дарак бўлмади. Кейинчалик футболчи жароҳат олганлиги учун таркибда эмаслигини билдиришди. Аслида ҳам шундаймикин, ёки ёки бунинг бошқа сабаби борми, буниси энди бизга қоронғу. Бундан ташқари дарвозабон Байрамниёз Бердиев ва унинг ватандоши Давлет Қличевларни жамоадан четлатилганликлари ҳақидаги хабарлар мухлислар орасида яшин тезлигида тарқади. 

Миш-миш ва хабарларга ойдинлик киритиш мақсадида “Навбаҳор”нинг ўтган хафтада ташкил этган сўнгги машғулотини кузатишни лозим топдик. Машғулот чоғида юқорида номлари келтирилган жамоа аъзоларининг йўқлигига амин бўлдик. Шу тариқа юқоридаги хабарларни бежизга юзага чиқмаганлигига яна бир бор амин бўлдик. 



“ASR FUTBOLI” газетасидан олинди. Ш. Содиков